Kakkabbuhhan nunman ey wada neladaw ni neikulitmat ni hi-gak. Immali hi Cabbigat et tuwak ang-angen di baley.
Hi Cabbigat hu aman Anita e hakey ni nemangulun nengulug di Antipolo, Ifugao.
Hi Anita hu nemaddang nan ahwak e hi Lou ni kewa-wa-wa ni nengibelin ni New Testament di ehel idan tutu-u tu. Ey et-eteng neipahding di biyag tu tep ya neamtaan tun kakulugan tud ehel Apu Dios.
Ey anin idan pamilyah tu, yadda aaggi tu niyadda gagayyum tu et pinhed da daman kullugen hi Jesu Christo ni kinulug tu. Et emin ida etan tellun bii niya hakey ni lakin aaggi tu ey nengulug ida.
Nem hedin hi Cabbigat nan hi Bugan e ahwatu man naneng tun daka ipappanukiil hu inamta da dedangngun pehding ni mambiyag. Tep hedin dedan hi Cabbigat man mabeki. Hi-gatu hu kamengibbekkin manuk niya killum ma-lat dawaten idan ispirituh linnaweda. Naka-amtan Cabbigat hu elaw idan ispirituh. Nemahhig ida niya anggetakkut ida. Kumpulmih ni timpuh hu pengidwatan dan degeh, aksidenteh winu katey.
Et mukun intultuluy Cabbigat ni mengibbekkin manuk, ya killum niya newang. E-eggel ni nambaki. Neligat hu biyag niya anggetakkut ni peteg ni nemnemnemen hu katey. Eleg mabalin ni an iwwalleng hu baki.
Nem wada tellun eleg mabalin ni kehhingen tun inhel Anita ni hi-gatu. Yahhuy hu hakey: Hedin makulug ni hakey ni ebuh hu Dios e hi-gatun ebuh keta-ta-geyan, niya hi-gatu nanletun emin, kele an i-enappitan hu nebabbabah ni dios?
Hakey pay: Hedin huyyan Dios hu kakelpuin emin ni hipan wada, kele tu hipa pengapyaan tun kai-appit ni tuu? Ya mekkatlu: Inhel Anita e hedin mettey di Cabbigat nan Bugan ey eleg ida mangulug nan Jesu Christo, man eleg da ang-anga law hi Anita e u-ungnga da.
Kanenemneman Cabbigat ida huyyan inhel ni u-ungnga tu. Entanni’t hakey ni hileng ey nan-i-innep. Ey inang-ang tu hu kros ni kamanla-la-yud di kabunyan. Ey dingngel tu hu kaman-e-hel e kantuy, “Yahhuy hu makulug dedan ni u-unnuden!”
Et yan nunman ni kakkabbuhhan ni nan-ung-ungbalan mi hu nenge-ehhelan tun ini-innep tu. Yan tuka penge-ehheli ey immi-ineng ni nekemtang ey ka-ang-ang di angah tu e kaman-am-amleng. Niya kamean-ang di matetu e heni neibangngad ni kaman-i-innep. Entanni ey kantuy “Bimmangunnak et kangkuy, ‘Huyya tu-wa law!’ Et yan nunman nengulugak. Yan nunya ey eleggak law umtakut ni katey tep ya nakka pengulug nan Jesus. Tawwey hedin hipa ngu anhan neminhedan idan edum ni gagayyum kun manhahha-ad eyad puyek.” (Anin hi ahwa tun hi Bugan et lektattuy nengulug dama.)
Nannemnemnem ey kantuy “Tam gulat na-mun eleg kayu umlin mengibbellin ni Ehel Apu Dios et eleggak kumulug.
Immehep law la hi Cabbigat ey hi-gak dama law kamannemnemnem. “Kayyaggud ni peteg hu neikulitmat ni hi-gak! Salamat Apu Dios ni nangngelak ni kayyaggud ni neipahding di biyag nan Cabbigat. Niya salamat ni neidwat ni ngunuk ni menigibbellin ni Ehel mu idan tutu-ud Ifugao. Em, salamat e Ama, et indawat mu u-ungngam ni menellaknib ni hi-gami. Kamengippetnga huyyan neidwat ni hi-gami - eleg amta e-helen.
(This article was written in English by Dick Hohulin and translated in Keley-i by Tessie D. Dulawan)
